ராஜமகேந்திரன் குடும்பம்

கெப்பிட்டல் மஹாராஜா மற்றும் அதன் அனைத்து துணை நிறுவனங்களும் ராஜமகேந்திரன் குடும்பத்திற்கு சொந்தமானது. கெப்பிட்டல் மஹாராஜா நிறுவனத்தின் ஸ்தாபர்களில் ஒருவரான சின்னத்தம்பி ராஜேந்திரம் அவர்களின் மகன் ராஜேந்திரம் ராஜமகேந்திரன். ஆர்.ராஜமகேந்திரன் சிறிய அளவிலான பங்குகளை மாத்திரமே கெப்பிட்டல் மஹாராஜாவில் நேரடியாகக் கொண்டுள்ள போதும், அவரும் அவரது மகன் சசிதரன் ராஜமகேந்திரனும் கெப்பிட்டல் ஹோல்டிங்ஸ் மூலமாக நிறுவனத்தின் பங்குகளை தக்க வைத்துள்ளனர். கெப்பிட்டல் ஹோல்டிங்ஸ் நிறுவனத்தில் ஆர்.ராஜமகேந்திரன் 79.95 வீதமான பங்குகளையும், சசிதரன் ராஜமகேந்திரன் 20.05 வீதமான பங்குகளையும் கொண்டுள்ளனர். கெப்பிட்டல் ஹோல்டிங்ஸ் கெப்பிட்டல் மஹாராஜா நிறுவனத்தில் 1.10 வீதமான நேரடிப் பங்குகளைக் கொண்டுள்ளது. கெப்பிட்டல் மஹாராஜா நிறுவனத்தில் பெரும்பான்மையான பங்குகளைக் கொண்டுள்ள எஸ் - லோன் இன்டஸ்ரியல் பிளாஸ்ரிக்ஸ், எஸ்-லோன் லங்கா, ஹரிசன்ஸ், ஐ.சி.எல் மார்க்கெட்டிங் மற்றும் ஏ.எவ் ஜோன்ஸ் எக்ஸ்போர்ட்ஸ் உட்பட பல நிறுவனங்களின் பங்குகளை கெப்பிட்டல் ஹோல்டிங்ஸ் தன்வசம் கொண்டுள்ளது. கெப்பிட்டல் ஹோல்டிங்ஸ் உட்பட பல நிறுவனங்களில் பங்குகளைக் கொண்டுள்ள சசிதரன் ராஜமகேந்திரன் கெப்பிட்டல் மஹாராஜா நிறுவனத்தின் முகாமைத்துவ பணிப்பாளராக உள்ளார். குடும்பத்தில் உள்ள மேலும் பலரும் நிறுவனத்தில் பல முக்கிய பொறுப்புக்களில் உள்ளனர். ராஜந்திரம் ராஜமகேந்திரனின் மனைவி குழுமத்தின் ஒரு நிறுவனமான ரூமர்ஸ் அழகுநிலையத்தின் பிரதம நிறைவேற்று அதிகாரியாக உள்ளார். இதேவேளை, ராஜமகேந்திரனின் மகள் அஞ்சலி ராஜமகேந்திரன் குழுமப் பணிப்பாளராக உள்ளார். ராஜேந்திரம் மஹாராஜா மற்றும் பத்மா மஹாராஜாவின் மகன் பிரதீப் மஹாராஜாவும் குழுமப் பணிப்பாளராக உள்ளார்.