அசோசியேட்டட் நியூஸ்பேப்பேர்ஸ் ஒவ் சிலோன் லிமிட்டட் (லேக் ஹவுஸ்)

இலங்கையின் பழமையானதும், பாரியதுமான பத்திரிகை நிறுவனங்களில் ஒன்று தான் லேக் ஹவுஸ் குழுமம் என அறியப்படும் அசோசியேட்டட் நியூஸ் பேர்ப்பர்ஸ் ஒவ் சிலோன் லிமிடெட் (ஏ.என்.சி.எல்). தற்போது நான்கு நாளேடுகள் (டெய்லி நியூஸ், தினமின, தினகரன் மற்றும் ரெச) மற்றும் மூன்று வார வெளியீடுகளை (சன்டே ஒப்சேவர், சிலுமின மற்றும் வாரமஞ்சரி) சிங்களம், தமிழ் மற்றும் ஆங்கில மொழிகளில் வெளியிடுகின்றது. இந்த நிறுவனம் 1926 ஆம் ஆண்டு டி.ஆர்.விஜேவர்த்தன அவர்களினால் தனியார் நிறுவனமாக ஆரம்பிக்கப்பட்டது. அவரின் பெயர் சூட்டப்பட்ட வீதியில் இந்த நிறுவனம் அமைந்துள்ளது. 1956 ஆம் ஆண்டு அவருடைய மறைவின் பின்னர், பத்திரிகை அவருடைய மருமகன் எஸ்மன்ட் விக்கிரமசிங்கவினால் நிர்வகிக்கப்பட்டு வந்தது. 1973 ஆம் ஆண்டு சிறிமாவோ பண்டாரநாயக்க அரசாங்கத்தினால் அசோசியேட்டட் நியூஸ்பேப்பர்ஸ் ஒவ் சிலோன் (சிறப்பு விதிகள்) சட்டம் இல. 28 இன் மூலம் தேசியமயமாக்கப்பட்டது. அதன் முதலாவது தலைவராக ஏ.கே.பிரமேதாச அவர்கள் நியமிக்கப்பட்டார்கள். தற்போது, பொதுநம்பிக்கை பொறுப்பாளர் திணைக்களம், 10 நிறுவனங்கள் மற்றும் 88 தனிநபர்கள் உட்பட 99 பங்குதாரர்கள் உள்ளனர். இந்த தனிநபர்கள் ஏ.என்.சி.எல் ஸ்தாபகர்களின் உறவினர்களும், தேசியமயமாக்கப்படுவதற்கு முன்னர் அதில் பங்குகளை வைத்திருந்தவர்களும் ஆவார்கள். இவர்களில் தற்போதைய பிரதமர் ரணில் விக்கிரமசிங்கவும் ஒருவர். அவர் 0.19 வீதமான பங்குகளை வைத்திருக்கின்றார். விஜய பத்திரிகையின் உரிமையாளர் ரஞ்சித் சுஜிவ விஜேவர்த்தன 0.57 வீதமான பங்குகளை வைத்திருக்கின்றார். 87.56 வீதமான பங்குகள் அரசாங்கத்தின் சார்பாக பொதுநம்பிக்கை பொறுப்பாளர் திணைக்களத்தின் வசம் உள்ளது. இது நீதி மற்றும் சிறைச்சாலைகள் மறுசீரமைப்பு அமைச்சின் கண்காணிப்பில் வருகின்றது. ஏ.என்.சி.எல் சட்டமானது இந்தப் பங்குகளை பொதுமக்களுக்கு வழங்குவதற்கு பொதுநம்பிக்கை பொறுப்பாளர் திணைக்களத்திற்கு அனுமதியளிக்கின்றது. கூட்டுறவு சங்க சட்டங்களின் கீழ் பதிவு செய்யப்பட்ட சங்கங்கள், சங்க கட்டளைகளின் கீழ் பதிவு செய்யப்பட்ட சங்கங்கள், தொழிற்சங்க கட்டளைகளின் கீழ் பதிவு செய்யப்பட்ட தொழிற்சங்கங்கள், பொது நிறுவனங்கள், ஊடகவியலாளர்கள், நிறுவனங்களில் பணி புரிபவர்கள் இதில் அடங்குவர். எனினும், அச்சு மற்றும் பத்திரிகை பிரசுர வர்த்தகத்தில் ஈடுபடும் நிறுவனங்கள் பங்குகளை வாங்க முடியாது. மேலும் எந்தவொரு தனிநபரும் 2 வீதத்திற்கும் அதிகமான பங்குகளை வைத்திருக்க முடியாது. இதன் மூலம் ஒருவரோ அல்லது ஒரு சில நபர்களோ அதிகாரத்தை கையில் வைத்திருப்பதை தடை செய்கின்றது. எனினும், சட்டத்திற்கு அமைவாக உரிமைத்துவத்தை பரவலாக்க வேண்டும் என உச்ச நீதிமன்றத்தில் வழங்குகள் தொடுக்கப்பட்ட போதும், ஊடகத்துறை அழுத்தம் விடுத்த போதும் இதுவரை பொதுநம்பிக்கை பொறுப்பாளர் திணைக்களத்தில் இருந்து பொதுமக்களுக்கு பங்குப் பரிமாற்றம் நடைபெறவில்லை. பாரிய செய்தி நிறுவனம் ஒன்றின் உரிமைத்துவத்தை அரசாங்கத்தின் கீழ் உள்ள நிறுவனத்தின் கட்டுப்பாட்டில் வைத்திருக்கும் வகையில் இந்த சட்டம் இயற்றப்பட்டுள்ளது. (மேலதிக தகவல்களுக்கு சட்ட மதிப்பீடுகளைப் பார்க்கவும்)